बेसीशहर, चैत्र ७ गते । लमजुङ जिल्लाका ८ वटै स्थानीय तहका ८३ वटा विद्यालयहरुले शान्ति सुरक्षामा विविध बिषयहरु समेटिएको जनचेतनामुलक प्रशिक्षण सामाग्री अध्यापन गराउने भएका छन् ।
समुदाय-प्रहरी साझेदारी कार्यक्रम अन्तर्गत जिल्ला प्रहरी कार्यालय लमजुङले स्थानीय नियकासंग सहकार्य गरी ती विद्यालयमा अध्ययनरत बालबालिकाहरूमा अपराध, अपराधको रोकथाम, सामाजिक विकृति विसंगति, लागू औषध, प्रविधिको प्रयोगबाट बढ्दै गइरहेको विभिन्न अपराधहरू र कानूनी प्रावधान सम्बन्धमा जानकारी गराई अपराध विरुद्ध सचेतना अभिवृद्धि गरी शान्तिपूर्ण र सुरक्षित समाज निर्माण गर्ने लक्ष्यका साथ प्रशिक्षण सामग्री उपलब्ध गराएकाे छ ।
यसका लागि ती विद्यालयहरुसंग जिल्ला प्रहरी कार्यालयले सम्झौता समेत गरेकाे छ । जिल्ला प्रहरी कार्यालय लमजुङका प्रमुख डिएसपी मीनबहादुर घलेले समाजमा अपराध रोकथाम वा न्युनिकरणका लागि प्रहरी प्रधान कार्यालयले तयार पारेकाे पाठयक्रम ती विद्यालयहरूमा अध्यापन गराइने छ । सामाजिक अपराध, घरेलु हिंसा र उजुरी दिने कार्यविधि, करणीसम्बन्धी कसुर, ट्राफिक सचेतना, विपद्, जोखिम र न्यूनीकरणका उपाय, आत्महत्याका सङ्केत र बचाउने उपाय, घटनास्थलको सुरक्षा र अपराध तथ्याङ्क पद्धतिका बारेमा पाठ्यक्रममा सामग्री राखिएको र यसले अपराध नियन्त्रण र न्यूनिकरणका लागि सहयोग पुग्ने विश्वास लिइएको घलेले बताए ।
स्थानीय तह–प्रहरी–विद्यालय सम्पर्क कार्यक्रम समझदारी पत्रमा त्रिपक्षीय हस्ताक्षर गरिएको छ । साे जनचेतनामुलक पाठ्य सामाग्री लमजुङ जिल्लाका प्रमुख जिल्ला अधिकारी, सम्बन्धित पालिकाका प्रमुख, प्रशासकीय अधिकृत, शिक्षा अधिकारी र जिल्ला प्रहरी प्रमुखको रोहबरमा माध्यमिक स्तरका सामुदायिक विद्यालयहरुलाई हस्तान्तरण गरिएको छ ।
लमजुङ जिल्लामा रहेका स्थानीय तह मध्ये बेसीशहर नगरपालिकाका १४, सुन्दरबजार नगरपालिकाका १३, मध्यनेपाल नगरपालिकाका १३, राईनास नगरपालिकाका ११, क्व्होलासोथार गाउँपालिकाका ९ , दुधपोखरी गाउँपालिकाका ५ , दोर्दी गाउँपालिकाका ८ र मर्स्याङदी गाउँपालिकाका १० गरी जम्मा ८३ वटा विद्यालयहरुलाई हस्तान्तरण गरिएको प्रहरी कार्यालयका सूचना अधिकारी थानेश्वर चपाइँले जानकारी दिए ।
