खबरकुञ्ज
बेसीशहर, कार्तिक ७ गते । हरिबोधनी एकादशीको अबसर पारेर लमजुङको मर्स्याङदी गाउँपालिकामा यहि कार्तिक २७ गतेदेखि मंसिर १ गतेसम्म एकादशी मेलाको साथमा दोस्रो मर्स्याङदी महोत्सव २०८१ आयोजना हुने भएको छ ।
अघिल्लो बर्षदेखि खुदीको एकादशी मेलालाई महोत्सवको रुपमा मनाउन थालिएकोमा यस बर्ष पनि निरन्तरता दिन लागिएको हो । मर्स्याङदी गाउँपालिकाको आयोजनामा हुन लागेको महोत्सव अन्तर्गत कार्तिक २७ र २८ गते हरिबोधनी एकादशीको धार्मिक मेला लाग्ने छ । यस अन्तर्गत मस्र्याङदी नदीमा फूलको डोरी तार्ने, सांस्कृतिक कार्यक्रम, वडास्तरीय भलिवल प्रतियोगिता स्वास्थ्य शिविर सञ्चालन गरि राष्ट्रिय विभूति भक्ति थापा जन्मस्थन पार्क र डा हर्क गुरुङ समाधिस्थल पार्कमा विभिन्न कार्यक्रम आयोजना हुने छन् ।
कार्तिक २९ गतेका मर्स्याङदी गाउँपालिकाको वडा नं ४ स्थित जगत बजारमा जगत तातोपानी महोत्सव गरिने छ । सो दिन जगत तातोपानी कुण्डमा स्नान, स्थानीय कला संस्कृतिको प्रदर्शनी र स्थानीय उत्पादनहरुको प्रदर्शनी तथा बिक्री वितरणलगायत कार्यक्रम तय गरिएको छ ।
यसैगरि कार्तिक ३० गते मस्र्याङदी गाउँपालिकाका विभिन्न वडाका भीरहरुमा भीरमह शिकार (हनि हन्टिङ) को कार्यक्रम तय गरिएको छ । घनपोखराका साथै ताघ्रिङको काप्रेभीर, स्याँगे भीर, मिप्रा, घेर्मु, बाहुनडाँडाका विभिन्न भीरमा भीर मौरी शिकारको कार्यक्रम तय गरिएको पालिकाका अध्यक्ष अर्जुन गुरुङले जानकारी दिए ।
यसैगरी, मंसिर १ गते मस्र्याङ्दी गाउँपालिका– ४ स्याँगे स्याँगेमा रहेको स्यांगे छहरा, च्याम्चेको बुङ झरना र अक्टोपस झरनामा पनि महोत्सवको तयारी गरिएको अध्यक्ष गुरुङले जानकारी दिए । पर्यटकीय महत्वका यी झरनाको प्रचार प्रसारका साथै स्थानीय कला संस्कृतिको प्रदर्शनी र स्थानीय उत्पादनहरुको प्रदर्शनी तथा विक्रीको कार्यक्रम राखिएको छ ।
महोत्सव अन्तर्गत एकादशी मेला खुदी युथ सोसइटी र खुदी टोल विकास संस्थाले ब्यवस्थापन गर्ने छन् । तातोपानी महोत्सवको संयोजन जगत टोल विकास संस्था र तातोपानी युवा क्लवले गर्ने भएका छन् । महशिकारको कार्यक्रममा सम्बन्धित वडा कार्यालयले ब्यवस्थापन गर्ने गरी तयारी भएको छ । त्यस्तै झरना महोत्सवमा स्यांगे टोल विकास संस्था, कन्यादेवी युवा क्लव मिप्रा, च्याम्चे टोल विकास संस्था र च्याम्चे युवा क्लवले सहआयोजकको भूमिका निर्वाह गर्ने भएका छन् ।
पालिकालाई होमस्टेको हब बनाउने लक्ष्य लिएको मर्स्याङदी गाउँपालिकाले महोत्सव अवधिभर पालिकाभित्रका विभिन्न पर्यटकीय गाउँहरुमा होमस्टेको प्याकेज बनाएको छ । गुरुङहरुको आदिम थलोसमेत रहेको सुन्दर घनपोखरा, सिउरुङ, नयाँगाउँ, मिप्रा, छापा, उस्ता, छिनखोला, ढंगै, खानीगाउँ रक गार्डेन, सञ्जापु लगायतका ग्रामीण पर्यटन र होमस्टेहरुको प्रचार प्रसार गरी ती गाउँहरुमा आन्तरिक तथा बाह्य पर्यटकको आगमन बढाउने कार्यक्रम गर्न लागिएको हो ।
